警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年10月4日 星期三

神學界欺凌事件



近日的神學教授block人潮之中,好出奇地,我竟然倖免於難。

點解話好出奇,因為兩年幾前,同佢已經有過衝突,唔應該話係衝突,係佢單方面cyberbully我。

因為之前我都有買過下佢D書,起初收到著名釋經學者的親自回覆係有D受寵若驚,甚至幾欣賞對方會上FB同人直接交流。

不過,對於我呢D網撚,好快聞到味,對方係來者不善,有一段時間,幾乎每出一篇文,對方幾個人就留言抽水嘲諷,你一言我一語。初初有還擊幾句,但好快就搞清楚對方唔係善意交流,係有心針對,當然亦多得幾個善心人告知一D佢地私底下的對話,令我得悉內情。

秉承Golden principle(高登原則):「上網唔好咁認真」,我之後無再回佢地。對方後尾可能覺得玩厭咗,或者覺得贏咗,或者覺得恰件無名小卒無成功感,漸漸無咗件事。

點解當時無講出黎,喂,阿哥,我兩年幾前爆呢單野的話,一個係著名釋經學者,一個係網上無名blogger,你估大家信佢定信我。另一方面,呢D internet troll,一年閑閑地遇幾十個啦,下下都寫咪好唔得閑。

點解而家又講出黎,我並唔係想為近日事件火上加油,而係想指出,對方唔係近日先出問題,唔可以用一時唔小心,偶有失腳去解釋,好可能一向如此,只不過今次對象係另一個神學教授,事情先叫鬧大,中間有幾多人比佢咁蝦過圍過,我諗係無法統計。

又再秉承教會傳統教導,呼籲大家為佢,以及佢班手下祈禱,因為身處高位,權力越大的人,面對試探只會越大,希望對方能早日醒悟回轉,因為咁做真係會絆倒好多人。身邊有人已經因為近期呢一波神學界欺凌事件,講明唔會去神學大佬間神學院到讀。

近日神學界呢一單欺凌事件,呢種模式我稱之為「養狗咬人」,當然唔係呢班神學教授發明,一般權力鬥爭之中係好常用嘅手法。係本地基督教圈子之中,以我所知應該係暗黑社率先採用。暗黑社過去十幾年,同一堆外圍組織互為表裡,有一班人專打爛仔交,追擊、謾罵、糾纏不同立場的人,一搞聯署就不斷用分身去壯大聲勢。當有人要求暗黑社管束一下呢班人的做法同言論時,暗黑社負責人拍拍蘿友,話對方係獨立組織,同我地無聯繫,無法處理,推得一乾二淨。

不過由於過去長期縱容包庇,令呢堆外圍組織壯大到一個程度,可以獨立運作,唔再甘心做人羽翼,開始出現奪權情況,同暗黑社關係變差,認為暗黑社立場唔夠佢地堅定,太過軟弱,反過黎攻擊暗黑社。某某大聯盟負責人就因為一套戲,發炮轟暗黑社掌門人,睇到大家嘖嘖稱奇,最後演變成「養狼狗咬心口」,相信係當事人始料不及。

講遠咗,講返「養狗咬人」,一般而言,自己有頭有面上咗位,好少會落手落腳做粗重野,呢個世界永遠都係精人出口,笨人出手,即係,你幾何見個黑社會坐館出街斬人走粉做馬伕收陀地,係班細代勞,他日受靶亦係班細。

個運作模式大概係咁,首先當然係養返班fans,大家起初志同道合好好傾,傾嘅都係正經野,你自己傾慕的神學家/大牧竟然會同你做FB frd喎,同你傾信仰,仲會like你個post,係下面留言鼓勵你,作為一個普通信徒,真係幾受落會飄飄然。

神學大佬當然唔會出口叫你圍邊個針對邊個,咁做有失身份,亦會落人口實,佢好可能只係引一篇文章,叫大家評論下,你彈的話,佢比個like你,你讚的話就乜都無。或者係你like咗敵對勢力一篇文時,佢多口質問你幾句,問到你口啞啞。一段時間幾個來回之下,下面班人自然read到神學大佬的意思。經過一定時日的反饋作用,淘汰緊一D諗法唔同嘅人,大家識睇眉頭眼額,唔駛神學大佬出聲,大家會知佢喜惡,鍾意邊個,唔鐘意邊個。

去到呢個地步,養熟咗可以放出去咬人。由於唔係神學大佬直接指揮,有人追究到佢身上,甚至可以扮無辜,扮受害者,正如暗黑社一樣,話自己點解要為其他人的言論負責,我同佢係FB frd咋喎,又無見過面,你有乜事就搵佢地,但明眼人一睇,知道佢地係一個團夥。甚至可以反咬一口話你誣蔑佢,佢口大你口細,佢人多你人少,到時你就百辭莫辯,無啦啦多個罪名叫「攻擊神的用人」。

而呢種模式,係有一個缺點,由於無直接的指揮關係,一切只係各自會意的情況下發生。當下層組織壯大到一個地步,可以自己獨立運作,出現自己思想時,自然會爭話事。做得神學大佬通常有幾分自恃,出手教訓下人,未必想致人死地。但下層組織不斷受呢種扭曲的牧養,嗜血成性,又點咁容易收手,唔咬死人,最少都要咬到斷手斷腳。

例如假設,而家班神學大佬出面話,叫班細唔好再去圍另一個神學教授,下面班人會唔會停手呢。定抑或係「我同阿公做咗咁多野,無功都有勞吖,假假地有幾百人跟我搵食,你而家叫我停就停,我咪好無面,咪即係話我以前咁為阿公做野唔啱咯,以後仲邊有人服你呀。嗱,我而家比面你,唔斬死佢,斬晒佢十隻手指落黎都得掛,唔係我點同下面交代。

近年有種醒悟,教會經常講分別為聖,自詡為一個聖潔的群體,不適合用世俗方法黎管理,自有聖靈來監查。任何嘗試引入世俗模式去監管,不止是不智,甚至是褻瀆,令教會淪為社會上一般組織。

但究竟咩叫世俗方法呢,又好似從來無乜人講得明白,譬如一般商業機構採取分層管理,層層職級分工清晰,但摩西管理以色列人,一樣係要分十夫長、百夫長、千夫長,咁分層管理係世俗方法,定神聖方法,我地真係可以咁樣分得清楚?

無辦法分得清咩叫世俗方法之同時,更加無乜人提出過乜野先係分別為聖的管理制度,只係不斷訴諸一D籠統的大道理,例如「聖靈引導」、「神掌權」、「順服掌權者」,結果教會內部變相係全無監管。

一個缺乏監管的組織,腐敗是惟一結局,教會也不例外。

相反,作為一件係商業世界打滾嘅打工仔,商業社會絕對唔教會講得咁差,一樣有自己的商業倫理,違反公司守則隨時炒魷大吉,邊有好似教會咁多關懷同愛,仲要為你禱告等你回轉。係一個資本主義社會中,大家講求利益,出黎行為求財唔係求氣,只要你摸清到利益關係,要生存,甚至獲利唔係難事。

我遇過最狗屁倒灶的事,通常發生係D理念團體入面,例如學校、教會等等,正因為無利益可言,大家先會為少少唔啱呀鬥過你死我活,不見血唔罷休。

講到尾,教會係一個江湖,腥風血雨在所難免。刀劍無眼,拳腳無情,大家睇熱鬧自己小心D。

1 則留言:

  1. 亞媽教落:基督徒都係人啫!

    係!神學教授都係人,有人既地方就係煩!

    真係無期望,無失望。食住花生等睇戲。

    回覆刪除